Minggu, 07 Juni 2015

Babalas Pantun

“WAYAH ini sudah mulai bakurang urang babalas pantun,” ujar Garbus.

“Suatu kamajuan Bus ai,” sahut Tulamak.

“Kanapa maka dipadahakan kamajuan Mak?” ujar Garbus.

“Karna urang basusuluan atawa ba-antaran kada parlu bangalih-ngalih lagi mancari tukang pantun karna wayah ini tukang pantun makin bakurang,” ujar Tulamak.

“Kukira malah suatu kamunduran karna kita kahilangan budaya pantun-bapantun sebagai warisan tatua-tatuha kita dahulu,” balas Garbus.

“Wayah ini zaman muderen. Nang banyak tajadi, bibinian wan lalakian bila sudah cucuk langsung nikah, langsung basangding dan langsung kawin,” ujar Tulamak.

“Itu ngarannya budaya rusak Mak ai karna kakanakan wayah ini banyak jua imbah langsung kawin lalu talu atawa ampat bulan langsung baranakan. Pabila maulahnya?” ujar Garbus.

“Itu ngarannya budaya bejat moral,” ujar Palui.

“Aku sependapat wan ikam Lui ai, karnanya budaya bapapantunan parlu dihidupkan kembali,” ujar Garbus.

“Ayu surung pantun ikam Lui?” ujar Tulamak manggasak.

“Aku ada baisian semacam papantunan, ayu dangarakan,” ujar Garbus manyuruh.

“Malu bertanya sesat di jalan. Makanya rajin-rajinlah bertanya supaya jangan sesat.

Tapi bila karancakan batakun pasti urangnya bungul,” ujar Garbus lihum.

“Aku kada paham pantun ikam itu Bus ai, pina kada mangaruan polanya,” ujar Tulamak.

“Maka tadi kusambat papantunan,” ujar Garbus.

“Pantun singkat itu kaya ini nah...,” ujar Tulamak.

“Bila cinta sudah melekat tahi gigi rasa suklat,” ujar Tulamak mambalas.

“Dangarakan pantun nang baik, sesuai kalakuan ikam badua” ujar Palui.

“Rajin pangkal pandai, hemat pangkal kaya, enak sakilan di atas paha.”
--banjarmasin post--

Previous
Next Post »