Minggu, 07 Juni 2015

Indah Katulahan

HARI Ahad itu Palui wan Garbus bajanji handak bajalanan ka Gambut. Rancananya handak manukar tantaran unjun wan umpan-umpannya karna mandangar habar wayahini pahumaan sudah babanyu dalam dan sudah banyak anak iwaknya.

“Supaya nyaman bamandak wan baistirahat di jalanan hari ini kita basapida mutur vespa haja,” ujar Palui wayah manyinggahi Garbus.

“Turun ja satumat Lui ai, mati-i masinnya,” ujar Garbus manyuruh singgah.

“Masin vespaku kada kawa dimati-i, karna bila masinnya mati ngalih hidupnya. Maklum masin tuha,” ujar Palui.

“Biniku lagi manjarang gumbili, hadangi satumat. Baisukan hari dingin-dingin ini nyaman banar makan gumbili bajarang wan nyiur baparut,” ujar Garbus manyuruh Palui singgah.

Karna babarapa kali disuruh singgah maka tapaksa jua Palui turun pada vespanya. Imbah mamati-i masin lalu Palui mancari kasandaran vespanya karna batis standarnya sudah kadada lagi.

“Hapuk banar gumbili ikam ini Bus ai, di mana manukarnya,” ujar Palui batakun.

“Gumbili mancabut di kabun Lui ai, aku paham haja kaina imbah bulikan matan Gambut ikam kusangui,” ujar Garbus.

Lalu imbah tuntung makan gumbili, Palui mambawai Garbus tulakan.

“Tadi sudah kupadahakan bahwa vespaku ulahan tahun 1950 makanya masinnya ngalih hidup, tulung tunjulakan,” ujar Palui manyuruh.

Imbah manunjul kurang labih saratus meter, masin vespanya mau hidup.

“Ayu lakasi babuat Bus, supaya jangan kasiangan,” ujar Palui manyuruh.

Sabalum babuat ka vespa Palui, Garbus baastilah mambujurakan salawarnya supaya jangan tamasuk ka masinnya.

“Bismillah... parmisilah pakacil, ulun umpat manunggang sampiyan,” ujar Garbus.

“Hau, kanapa Bus maka ikam pina baucap parmisi pakacil wayah manaiki vespaku,” ujar Palui pina hiran.

“Vespa ikam ini tamasuk ras tuha tahun 1950, sedangkan aku dilahirakan tahun 1970. Jadi aku harus parmisi wan pakacil vespa supaya jangan katulahan,” ujar Garbus.

“Ikam itu kada katulahan wan vespa Bus ai tapi katulahan wan aku karna ikam wani maragap awakku,” ujar Palui.

“Kalu aku kada maragap ikam Lui ai pasti aku tagugur, ikam laju banar manjalanakan vespa apalagi lapak kadudukannya baguyang guyang kadada lagi murnya,” sahut Garbus pina manggitir.

“Maragap, bulih haja maragap, tapi jangan manggaritiki pinggangku, aku galianan banar, kaina ikam bisa katulahan wan pakacil halus nang di bawah ini,” ujar Palui makin bagancang mangacak gas vespanya.
( banjarmasin post )

Previous
Next Post »